ธมฺมี สงฺฆี ญาณี หตฺถี, จกฺกี ปกฺขี ทาฐี รฏฺฐี;

ฉตฺตี มาลี จมฺมี โยคี, ภาคี โภคี กามี สามีฯ

ธชี คณี สสี กุฏฺฐี, ชฏี ยานี สุขี สิขี;

ทนฺตี มนฺตี กรี จาคี, กุสลี มุสลี พลี; (วาจี, รู)

ปาปการี สตฺตุฆาตี, มาลฺยการี ทีฆชีวี;

ธมฺมวาที สีหนาที, ภูมิสายี สีฆยายีฯ

อีการนฺตํฯ

ภิกฺขุ, สิโลโปฯ ลสญฺญายํ –

83. ลา โยนํ โว ปุเม

ลโต โยนํ โว โหติ วา ปุลฺลิงฺเคฯ

94. เว+โวสุ ลุสฺส

ลสญฺญสฺส อุสฺส เว+โวสุ ฏ โหติฯ เอตฺถ ‘‘ปุมาลปเน เวโว’’ ตฺย+ตฺร โวสฺส สหจริตญายา อนิสฺสิตตฺตา ชาติวเสน ‘‘ลา โยนํ’’ ตฺยาโท โว จ คยฺหติฯ ภิกฺขโวฯ อญฺญตฺร ‘‘โลโป’’ติ โยโลโปฯ ‘‘โยโลปนิสุ ทีโฆ’’ติ ทีเฆ ภิกฺขูฯ โภ ภิกฺขุ ภิกฺขูฯ

96. ปุมา+ลปเน เวโว

ลสญฺญโต อุโต โยสฺสา+ลปเน เว+โว โหนฺติ วา ปุลฺลิงฺเคฯ ภิกฺขเว ภิกฺขโว ภิกฺขูฯ ภิกฺขุํ, ภิกฺขโว ภิกฺขูฯ ภิกฺขุนา , ภิกฺขูหิ ภิกฺขูภิฯ ‘‘ฌลา สสฺส โน’’ติ ลโต สสฺส โน วา, ภิกฺขุโน ภิกฺขุสฺส, ภิกฺขูนํฯ ‘‘นา สฺมาสฺสา’’ติ ลโต วา สฺมาสฺส นา, ภิกฺขุนา ภิกฺขุมฺหา ภิกฺขุสฺมาฯ ภิกฺขุมฺหิ ภิกฺขุสฺมิํฯ เอวํ –

เสตุ เกตุ ราหุ ภาณุ, สํกุ อุจฺฉุ เวฬุ มจฺจุฯ (ปงฺคุ, รู) สินฺธุ พนฺธุ เนรุ เมรุ, สตฺตุ การุ เหตุ ชนฺตุฯ รุรุ ปฏุ – อิจฺจาทโยฯ

ชนฺตุ+เหตูนํ โยสฺว+ยํ เภโทฯ ‘‘ชนฺตุ+เหตฺวี+ฆ+เปหิ วา’’ติ โยโลเป –

84. ชนฺตฺวาทิโต โน จ

ชนฺตฺวาทิโต โยนํ โน โหติ โว จ ปุลฺลิงฺเคฯ ชนฺตุโน ชนฺตโว ชนฺตุโยฯ โภ ชนฺตุ ชนฺตู, ชนฺตุโน, ‘‘ปุมาลปเน เวโว’’ติ เว+โว, ชนฺตเว ชนฺตโว ชนฺตุโยฯ ชนฺตุํ, ชนฺตู ชนฺตุโน ชนฺตโว ชนฺตุโยฯ เสสํ ภิกฺขุสมํฯ

เหตุ, เหตู เหตโวฯ ‘‘โยมฺหิ วา กฺวจี’’ติ ลสญฺญสฺส อุสฺส วา ฏาเทโส, เหตโยฯ โยมฺหิ อนฺตรงฺคตฺตา ปฐมํ ฏาเทเส กเต ปจฺฉา โยโลปาภาโว, ตถา หิ อนฺตรงฺค+พาหิรงฺควิธาเนสฺว+นฺตรงฺควิธิเยว พลวาฯ เอตฺถ จ ปกตินิสฺสิต+มนฺตรงฺคํ, ปจฺจยนิสฺสิตํ พาหิรงฺคํฯ เหตุโยฯ โภ เหตุ, เหตู เหตเว เหตโว เหตโย เหตุโยฯ เสสํ ปุพฺพสมํฯ